Массимилиано Аллегрининг «Наполи»га тайинланиш имкониятлари ортиб бормоқда, деб хабар беради Corriere della Sera нашри Calciomercato’га таяниб.

Гарчи Маурицио Сарри Антонио Контенинг асосий вориси сифатида кўрилаётган бўлса-да, «Аталанта» ҳам унга даъвогарлик қилмоқда. Бу эса «Лацио» бош мураббийини қийин танлов қаршисида қолдирмоқда.

Бундай вазиятда сўнгги кунларда «Наполи» спорт директори Жованни Манна айни дамда «Милан»ни бошқараётган Аллегри билан кечки овқат устида учрашув ўтказди. Суҳбат давомида италиялик мутахассисга ҳали у миланликлар бошқарувини қўлга олишидан аввал — ўтган йили таклиф қилинган икки йиллик шартнома муҳокама қилинди.

Неаполликлар ҳали ҳам бундай келишувга тайёр эканликларини Манна орқали билдиришди. Бироқ Аллегрининг ўзи «Милан»даги келажаги борасида ҳали бир қарорга келмагани сабабли жавоб беришга шошилмаяпти. У «россонери» раҳбарияти олдига қатор талабларни қўйган ва агар улар қабул қилинмаса, клубни тарк этади.