Германия терма жамоаси бош мураббийи Юлиан Нагельсманн ҳужумчи Никлас Фюллькругни нима сабабдан Жаҳон чемпионати қайдномасига киритмаганини тушунтириб берди.

«Вест Хэм»дан «Милан»га ижарага берилган 33 ёшли футболчи Германия миллий жамоаси сафидаги 24 та ўйинда ҳайратланарли даражада 14 та гол урган бўлса-да, бўлажак мундиалда иштирок этмайдиган бўлди.

«Фюллькругнинг «Вест Хэм» ва «Милан»даги кўрсаткичлари ҳамма нарсани айтиб турибди — у охирги икки йилда жуда кам гол урди. Ҳа, Италияда у кўп ҳимояланишига тўғри келаётганини ва кўпинча захирадан майдонга тушаётганини ҳисобга олиш керак, аммо барибир унинг сермаҳсуллиги ҳавас қиларли даражада эмас. Кимдир барибир рўйхатдан ташқарида қолиши керак эди», – дея Италия ОАВлари Нагельсманннинг сўзларидан иқтибос келтирмоқда.

Маълумот ўрнида, Германия терма жамоаси Жаҳон чемпионати гуруҳ босқичида Кюрасао, Кот-д’Ивуар ва Эквадор терма жамоаларига қарши баҳс олиб боради.