«Ал-Ҳилол» Саудия Арабистони чемпионати турнир жадвалида иккинчи ўринни эгаллади ва чемпионлик унвонини «Ан-Наср»га бой бериб қўйди.

Симоне Индзаги жамоаси сўнгги турда «Ал-Файҳа»ни мағлуб этди (1:0), бироқ рақобатчисига етиб ололмади — «Ан-Наср» «Дамак»ни тор-мор келтириб (4:1), икки очколик фарқни сақлаб қолди.

«Биз ҳафсаламиз пир бўлди. Одатда 84 очко биринчи ўрин учун етарли бўларди, аммо бу сафар эмас. Мен футболчиларга қилган ҳаракатлари учун миннатдорчилик билдирдим. Бу мавсумда жароҳатлар билан боғлиқ кўплаб қийинчиликларни бошдан кечирдик. Биз дунёда бирорта ҳам ўйинда ютқазмасдан, чемпионат олтин медалларисиз қолган ягона жамоага айландик», — дея журналист Альфредо Педулла Индзагининг сўзларидан иқтибос келтирмоқда.

Айтиш лозимки, италиялик мутахассис бу ўринда адашган: Португалиянинг «Бенфика» клуби ҳам чемпионат мавсумини бирорта мағлубиятсиз якунлаган, бироқ якунда фақат учинчи ўринни банд этган.

Эслатиб ўтамиз, Индзаги ўтган йилнинг ёзида Миланнинг «Интер» клубини тарк этиб, «Ал-Ҳилол» бошқарувини қўлга олган эди.