Мадриднинг «Реал» клуби собиқ футболчиси ва мураббийи Хорхе Вальдано Жозе Моуриньо ҳамда «қаймоқранглилар» ўртасидаги эҳтимолий келишувга шубҳа билан қарамоқда. У португалиялик мутахассис Мадрид клубининг муаммоларини ҳал қила олишига ишонмаяпти.
«Моуриньонинг ёлғиз ўзи «Реал» муаммоларини ҳал қилмайди. Бунинг учун етакчи футболчиларнинг кўмаги зарур. Шунингдек, аллақачон содир бўлган воқеаларни ҳисобга олсак, кийиниш хонасида кичик бир инқилоб қилиш керак», — дея Вальданонинг сўзларидан иқтибос келтирмоқда «derbyderbyderby.it» портали.
Эслатиб ўтамиз, Хорхе Вальдано 1994 йилдан 1996 йилгача «Реал»ни бошқарган ва ўшанда мавсум ўртасида — январь ойида истеъфога чиқарилган эди.
Ҳозирда Мадриднинг «Реал» клуби Испания чемпионати турнир жадвалида иккинчи ўринни эгаллаб турибди.
