«Манчестер Юнайтед»нинг бразилиялик хавбеки Каземиро Англия Премьер-лигасини МЛСга (АҚШ олий лигаси) алмаштириши мумкин. Бу ҳақда Sky Sports журналистлари хабар бермоқда.
Манба берган маълумотларга кўра, юлдуз ярим ҳимоячига «Лос-Анджелес Гэлакси» клуби янги даъвогар сифатида пайдо бўлган. Калифорния клуби 34 ёшли футболчи учун курашда таркибида аргентиналик Лионель Месси тўп сураётган «Интер Майами» жамоасига рақобат туғдирмоқчи. Бундан ташқари, Каземиронинг хизматларига Саудия Арабистони чемпионатининг бир нечта етакчи клублари ҳам қизиқиш билдирмоқда.
Эслатиб ўтамиз, аввалроқ тажрибали бразилиялик футболчи 2025/2026 йилги мавсум якунланганидан кейин «қизил иблислар» сафини тарк этиши маълум бўлган эди.
