«Ювентус» бош мураббийи Лучано Спаллетти агар жамоа мавсум якунларига кўра Чемпионлар лигасига йўлланмани қўлга кирита олмаса, клубдан кетиш имкониятини кўриб чиқмоқда. Бу ҳақда «La Stampa» нашри хабар бермоқда.
71 ёшли мутахассис туринликлар бошқарувини 2025 йилнинг октябрь ойида ўз қўлига олган эди ва яқиндагина шартномасини узайтирганди. Бироқ манбанинг берган маълумотларига кўра, клуб ичида Спаллетти ва спорт раҳбарияти ўртасида кескинлик юзага келган. Таъкидланишича, Чемпионлар лигасига чиқа олинмаган тақдирда, Спаллетти истеъфога чиқиш учун ариза беришга тайёр. Шу билан бирга, клуб раҳбарияти таркибни шакллантиришда мураббийга кўпроқ таъсир кучи бериш орқали уни қолишга кўндиришга уриниб кўриши ҳам мумкин.
А Сериянинг сўнгги тури олдидан «Ювентус» турнир жадвалида олтинчи ўринда бормоқда ва «Рома» ҳамда «Милан» клубларидан 2 очкога ортда қолмоқда.
