«Милан»нинг собиқ ҳимоячиси Тьяго Силва жамоадан кетганидан 14 йил ўтиб, яна Италия клубига қайтиши мумкин. «ESPN Brazil» нашрининг берган маълумотларига кўра, «россонерилар» бразилиялик футболчига бир йиллик шартнома таклиф қилган.

Шу йилнинг сентябрь ойида Силва 42 ёшни қаршилайди. Аввалроқ «Порту» клуби тажрибали ҳимоячи билан шартномани узайтирмаслиги маълум бўлган эди, бунинг натижасида у 30 июнь кунидан бошлаб эркин агентга айланади.

Тьяго Силва 2009 йилдан 2012 йилгача «Милан» шарафини ҳимоя қилган, шундан сўнг 42 миллион евро эвазига «ПСЖ»га сотиб юборилган эди. Кейинчалик у «Челси», «Флуминенсе» ва «Порту» клубларида тўп сурди. Ортда қолган мавсумда бразилиялик футболчи Португалия клуби сафида 14 та учрашувда майдонга тушди ва уларнинг 12 тасини асосий таркибда бошлади.

Шунингдек, Силва фаолиятини якунлаб, «Челси» академиясида мураббийлик фаолиятини бошлаш вариантини ҳам кўриб чиқаётгани хабар қилинмоқда.