«Барселона» спорт директори Деку Роберт Левандовски жамоадан кетганидан сўнг Каталония клуби ҳужум чизиғининг келажаги қандай бўлиши ҳақида гапирди. 37 ёшли футболчи ёзда клубни эркин агент сифатида тарк этади.

Раҳбарият вакили польяк форвардининг жамоа муваффақиятларига қўшган ҳиссасини ҳисобга олган ҳолда, унинг ўрнига муносиб футболчи топиш ўта қийин бўлишини таъкидлади.

«Бироз маҳзун кун, чунки Робертнинг кетиши ҳақиқатга айланмоқда. Уни алмаштиришнинг деярли имкони йўқ. У сўнгги йилларнинг энг яхши ҳужумчиси эди, унинг «Барселона» учун қилган ишларини такрорлаш жуда қийин», — дея Декунинг сўзларини келтиради «Mundo Deportivo» нашри.

Деку клуб аллақачон таркибни кучайтириш устида иш олиб бораётганини тасдиқлади, бироқ Левандовскининг ўрнига номзод сифатида кўрилаётган аниқ футболчилар, жумладан, Хулиан Альварес ва Жоау Педро ҳақида гаплашишни истамади.

«Биз ҳеч кимни рўйхатдан чиқариб ташлаганимиз йўқ ва ҳали ҳеч ким билан шартнома имзоламадик», — дея баёнот берди «Барселона» спорт директори.

Роберт Левандовски «Барселона» сафида ўтказган 192 та учрашувида 119 та гол урди ва 24 та голли узатмани амалга оширди. У клуб билан биргаликда уч бор Испания чемпиони ва Суперкубок соҳибига айланди, шунингдек, 1 марта мамлакат Кубогида зафар қучди.