Пеп Гвардиола «Манчестер Сити» клубини тарк этмоқда.
Каталониялик мутахассис жамоани 2016 йилнинг июль ойида қабул қилиб олган эди ва у «Сити»да роппа-роса 10 йил фаолият юритган бўлади.
«Ман Сити» билан биргаликда Пеп 6 марта АПЛ бош совринини қўлга киритди. У 2017/18, 2018/19, 2020/21, 2021/22, 2022/23 ва 2023/24 йилги мавсумларда Англияда тенгсиз деб топилди. Премьер-лига тарихида ундан кўп чемпионликни фақатгина Алекс Фергюсон қўлга киритган — шотландиялик афсона ҳисобида «Манчестер Юнайтед» билан 13 та чемпионлик мавжуд.
Шунингдек, Пеп «Сити» билан Чемпионлар лигасида зафар қучди, уч бор Англия Кубоги ва беш марта Лига Кубоги соҳибига айланди. 2022/23 йилги мавсумда жамоа требл қайд этган бўлса, АПЛ тарихида кетма-кет тўрт бор чемпионликни қўлга киритган илк клубга айланди.
АПЛ эрасида битта клубда энг узоқ вақт давомида фаолият юритиш бўйича Гвардиола кучли тўртликдан (топ-4) жой олди. Премьер-лигада фақатгина Арсен Венгер «Арсенал»да, Алекс Фергюсон «МЮ»да ва Дэвид Мойес «Эвертон»да ундан узоқроқ муддат давомида бош мураббий бўлиб ишлаган.
