Pep Gvardiola «Manchester Siti» klubini tark etmoqda.
Kataloniyalik mutaxassis jamoani 2016 yilning iyul oyida qabul qilib olgan edi va u «Siti»da roppa-rosa 10 yil faoliyat yuritgan bo‘ladi.
«Man Siti» bilan birgalikda Pep 6 marta APL bosh sovrinini qo‘lga kiritdi. U 2017/18, 2018/19, 2020/21, 2021/22, 2022/23 va 2023/24 yilgi mavsumlarda Angliyada tengsiz deb topildi. Premyer-liga tarixida undan ko‘p chempionlikni faqatgina Aleks Fergyuson qo‘lga kiritgan — shotlandiyalik afsona hisobida «Manchester Yunayted» bilan 13 ta chempionlik mavjud.
Shuningdek, Pep «Siti» bilan Chempionlar ligasida zafar quchdi, uch bor Angliya Kubogi va besh marta Liga Kubogi sohibiga aylandi. 2022/23 yilgi mavsumda jamoa trebl qayd etgan bo‘lsa, APL tarixida ketma-ket to‘rt bor chempionlikni qo‘lga kiritgan ilk klubga aylandi.
APL erasida bitta klubda eng uzoq vaqt davomida faoliyat yuritish bo‘yicha Gvardiola kuchli to‘rtlikdan (top-4) joy oldi. Premyer-ligada faqatgina Arsen Venger «Arsenal»da, Aleks Fergyuson «MYU»da va Devid Moyes «Everton»da undan uzoqroq muddat davomida bosh murabbiy bo‘lib ishlagan.
