А Серия клублари — «Интер» ва «Рома» ўйинчилар алмашинуви имкониятини кўриб чиқмоқда. La Gazzetta dello Sport хабарига кўра, битим яқин вақт ичида якунланиши мумкин. «Интер» «Рома»нинг 25 ёшли марказий ярим ҳимоячиси Ману Конега кўз тиккан, Рим клуби уни 50 миллион еврога баҳоламоқда. Бироқ «нерадзуррилар» бу суммани тўлашга тайёр эмас ва алмашинувнинг муқобил вариантини таклиф қилди.

Битим доирасида «Интер» 26 ёшли ярим ҳимоячи Давиде Фраттезини (қиймати 25 миллион евро) ҳамда қўшимча пул компенсациясини беришга тайёр. «Рома» билан битимнинг умумий қиймати 50 миллион еврони ташкил этади, бироқ молиявий сабабларга кўра, бу икки трансфер алоҳида келишув сифатида расмийлаштирилади. Клублар ўртасида музокаралар давом этмоқда.

Transfermarkt маълумотларига кўра, Ману Коненинг трансфер қиймати 50 миллион еврони, Давиде Фраттезиники эса 22 миллион еврони ташкил этади.