«Астон Вилла» ва Аргентина терма жамоаси дарвозабони Эмилиано Мартинес бармоғидаги кичик синиш туфайли сафдан чиқди. «Вилла» етакчиси «Фрайбург»га қарши кечган ва 3:0 ҳисобида ғалаба қозонилган Европа Лигаси финалида айнан шу жароҳат билан ўйнаган.
Журналист Гастон Эдулнинг хабар беришича, дарвозабон даволаниш курсини ўташи керак, аммо Аргентина терма жамоаси мураббийлар штаби унинг жаҳон чемпионатидаги илк ўйингача соғайиб улгуришига ишонмоқда. Тикланиш жараёни тахминан уч ҳафтани талаб қилади.
Аргентина терма жамоаси 17 июнь куни гуруҳ босқичининг 1-тури доирасида Жазоир билан тўқнаш келади. Ушбу квартетда, шунингдек, Австрия ва Иордания терма жамоалари ҳам ўрин олган. Эслатиб ўтамиз, Эмилиано Мартинес «албиселесте»нинг чемпионлиги билан якунланган ўтган мундиалнинг асосий қаҳрамонларидан бири бўлган эди.
