Нидерландия терма жамоаси бош мураббийи Рональд Куман ҳужумчи Мемфис Депай жаҳон чемпионатида иштирок эта олишига умид қилмоқда. Аввалроқ хабар қилинганидек, «Коринтианс» футболчиси жароҳати туфайли мундиални ўтказиб юбориши мумкин. The Touchline нашри тарқатган маълумотларга кўра, Куман Депайнинг тикланишини кутиш мақсадида терма жамоанинг расмий қайдномасини эълон қилишни кечиктиришга тайёр.
Ҳозирча 32 ёшли ҳужумчи мусобақа бошланишига қадар соғайиб улгурадими ёки йўқми, бу номаълум. Эслатиб ўтамиз, барча терма жамоалар ўз таркибларини май ойи охирига қадар эълон қилишлари шарт.
Мемфис Депай Нидерландия терма жамоаси тарихидаги энг яхши тўпурар мақомини сақлаб қолмоқда — унинг ҳисобида 55 та гол мавжуд. «Апелсинранглар» гуруҳ босқичида Тунис, Япония ва Швеция терма жамоаларига қарши кураш олиб боради.
