Niderlandiya terma jamoasi bosh murabbiyi Ronald Kuman hujumchi Memfis Depay jahon chempionatida ishtirok eta olishiga umid qilmoqda. Avvalroq xabar qilinganidek, «Korintians» futbolchisi jarohati tufayli mundialni o‘tkazib yuborishi mumkin. The Touchline nashri tarqatgan ma’lumotlarga ko‘ra, Kuman Depayning tiklanishini kutish maqsadida terma jamoaning rasmiy qaydnomasini e’lon qilishni kechiktirishga tayyor.
Hozircha 32 yoshli hujumchi musobaqa boshlanishiga qadar sog‘ayib ulguradimi yoki yo‘qmi, bu noma’lum. Eslatib o‘tamiz, barcha terma jamoalar o‘z tarkiblarini may oyi oxiriga qadar e’lon qilishlari shart.
Memfis Depay Niderlandiya terma jamoasi tarixidagi eng yaxshi to‘purar maqomini saqlab qolmoqda — uning hisobida 55 ta gol mavjud. «Apelsinranglar» guruh bosqichida Tunis, Yaponiya va Shvesiya terma jamoalariga qarshi kurash olib boradi.
