«Манчестер Сити» собиқ ҳимоячиси Майка Ричардс Пеп Гвардиоланинг «шаҳарликлар» бош мураббийлигидан кетиши борасида фикр билдирди.

«Бу «Манчестер Сити» қўрққан лаҳза эди. Аммо бутун инглиз футболи ҳам Гвардиолани соғинади. У ҳақиқий афсона ва унинг кетаётганидан хафаман – усиз Премьер-лига аввалгидек бўлмайди.

Пеп – биз кўрган энг яхши мураббийлардан бири. Тарихдаги энг буюгими? Бундай суҳбатларда Фергюсонга ҳурмат бажо келтирмаслик қийин, аммо у бошқа давр эди. Гвардиола шубҳасиз замонамизнинг энг буюк мураббийидир.

Агар уларнинг ҳар иккиси ютган совринларга қарасангиз – биламан, буни ўқиган ҳар бир киши «Ман Сити» анча кўп пул сарфлаган дейди ва мен буни тушунаман – Пеп «Барселона» ва «Ман Сити» билан требл қайд этди, бунинг ўзи ҳайратланарли.

Бироқ улар орасидаги асосий фарқ шундаки, Фергюсон буюк менеджер эди, Гвардиола эса – энг буюк мураббий. У Англияда футболга бўлган ёндашувни ўзидан олдинги ҳеч ким қилмаган даражада ўзгартирди», — деб ёзди Ричардс.