34 ёшли ярим ҳимоячи Хамес Родригес «Реал»дан кетиш арафасида «Манчестер Юнайтед»га ўтишга яқин бўлгани, бироқ Карло Анчелоттининг биргина қўнғироғи барчасини ўзгартириб юборганини ҳикоя қилди. Бу ҳақда футболчи Netflix ҳужжатли фильмида сўзлаб берди.

Родригеснинг эслашича, ўша пайтда «Манчестер Юнайтед» билан келишувга жуда яқин эди:

«Ҳеч ким билмайди, аммо «Реал»ни тарк этгач, «Манчестер Юнайтед» билан шартнома имзолашим керак эди. Жорже Мендеш мендан «Бавария»га ўтишни хоҳлайсанми?» деб сўради. Мен эса ҳайрон бўлиб, у ерда Рибери ва Роббен борлигини, қаерда ўйнашимни сўрадим. У «Карло Анчелотти сени сўраган», деди», – дейди колумбиялик футболчи.

Шундан сўнг Карло Анчелотти шахсан Хамесга телефон қилган.

«Анчелоттига «Мен «Манчестер»га ўтмоқчиман», дедим. У эса «Қанақа «Манчестер»? У ер «ўлик» (ривожланмаяпти). Сен менинг жамоамга келишинг керак», дея жавоб берди. Ўйлашимча, «Бавария»га ўтиш энг тўғри қарор бўлган», – дея таъкидлади Хамес Родригес.