«Ливерпуль» клуби раҳбарияти Арне Слот ишдан бўшатилган тақдирда, унинг ўрнига Андони Ираола номзодини жиддий ўрганмоқда. Бу ҳақда таниқли инсайдер Фабрицио Романо ўз подкастида маълум қилди.
Манбага кўра, испаниялик мутахассис Андони Ираола аллақачон «Кристал Пэлас»дан таклиф олган, бироқ у ҳали якуний қарорга келганича йўқ. Мураббий ўз фаолиятини давом эттириш учун энг мақбул вариантни танлаш ниятида ва у устуворликни Англия Премьер-лигаси клубларига бермоқда.
«Ливерпуль» раҳбарияти эса яқин кунларда Арне Слот билан учрашув ўтказиши кутилмоқда. Унда мавсум якунлари сарҳисоб қилинади ва нидерландиялик мутахассиснинг клубдаги келажаги борасида якуний қарор қабул қилинади.
Эслатиб ўтамиз, Ираола жорий мавсум якунида «Борнмут»ни тарк этиши маълум бўлган эди. У «олчалар»ни 2023 йилнинг ёзидан буён бошқариб келаётганди. Охирги кунларда ОАВда Арне Слотнинг мавсум якунида «Ливерпуль»дан кетиши мумкинлиги ҳақидаги хабарлар кўпайиб бормоқда.
