«Liverpul» klubi rahbariyati Arne Slot ishdan bo‘shatilgan taqdirda, uning o‘rniga Andoni Iraola nomzodini jiddiy o‘rganmoqda. Bu haqda taniqli insayder Fabrisio Romano o‘z podkastida ma’lum qildi.
Manbaga ko‘ra, ispaniyalik mutaxassis Andoni Iraola allaqachon «Kristal Pelas»dan taklif olgan, biroq u hali yakuniy qarorga kelganicha yo‘q. Murabbiy o‘z faoliyatini davom ettirish uchun eng maqbul variantni tanlash niyatida va u ustuvorlikni Angliya Premyer-ligasi klublariga bermoqda.
«Liverpul» rahbariyati esa yaqin kunlarda Arne Slot bilan uchrashuv o‘tkazishi kutilmoqda. Unda mavsum yakunlari sarhisob qilinadi va niderlandiyalik mutaxassisning klubdagi kelajagi borasida yakuniy qaror qabul qilinadi.
Eslatib o‘tamiz, Iraola joriy mavsum yakunida «Bornmut»ni tark etishi ma’lum bo‘lgan edi. U «olchalar»ni 2023 yilning yozidan buyon boshqarib kelayotgandi. Oxirgi kunlarda OAVda Arne Slotning mavsum yakunida «Liverpul»dan ketishi mumkinligi haqidagi xabarlar ko‘payib bormoqda.
