Давид Алаба клубдаги сўнгги ўйинидан сўнг «Сантьяго Бернабеу» томошабинлари билан хайрлашди. Австриялик футболчи Ла Лиганинг сўнгги тури доирасида «Атлетик Бильбао»га қарши кечган баҳснинг 70-дақиқасида захирага олинди. Учрашув «қаймоқранглилар»нинг 4:2 ҳисобидаги ғалабаси билан якунланди. Финал ҳуштагидан сўнг Алаба микрофон орқали мухлисларга хайруллашув нутқини сўзлади.
«Мен узун нутқ тайёрламагандим, озгина хижолатдаман. Барча йиллар ва қўллаб-қувватлаганингиз учун раҳмат айтмоқчиман. Оғир жароҳатни бошдан ўтказдим, шу сабаб кутганимдан камроқ ўйнадим, лекин сиз доим ёнимда бўлдингиз. Ҳаммаси учун сиздан миннатдорман. Сиз абадий қалбимдасиз. Hala Madrid!» — дея 33 ёшли футболчининг сўзларини Madrid Xtra нашри келтиради.
Давид Алаба 2021 йилдан бери «Реал» шарафини ҳимоя қилиб келаётган эди.
