Жозе Моуриньо Мадриднинг «Реал» клуби билан бўлаётган музокаралари натижасидан қатъи назар, «Бенфика» бош мураббийи лавозимини тарк этади. Агар Флорентино Перес «қироллик клуби» президентлик сайловларида ғалаба қозонса, португалиялик мутахассис аниқ Мадридга йўл олади. Бироқ бу содир бўлмаган тақдирда ҳам, томонлар ўртасидаги келишмовчиликлар туфайли ҳамкорлик тугаши кутилмоқда.
«Бенфика» раҳбарияти Моуриньонинг янги шартнома бўйича таклифларни 24 майга қадар кўриб чиқмаслиги ҳақидаги оммавий баёнотидан норози. Ўз навбатида, мураббий клубни айнан «Реал»дан қизиқиш билдирилганидан кейингина шартномани узайтиришни таклиф қилганида айбламоқда.
Аввалроқ Моуриньо «Реал» бош мураббийи лавозимига асосий номзод сифатида кўрилаётгани ҳақида хабар берилганди. «Қироллик клуби» аллақачон Альваро Арбелоа жамоа билан ишлашни тўхтатганини расман эълон қилган.
