“Оқ-тепа” – “Шердор” учрашуви якунлангач, тошкентликлар устози Александр Султанович Токовнинг ўйин ҳақидаги фикрлари билан қизиқдик.

— Бугун ҳам аввалги беллашувларда бўлгани каби рақиб дарвозасини ишғол қилиш учун жуда кўп имкониятларга эга бўлдик. Агар футболчиларим яратилган вазиятлардан фойдаланишганида ўйин тақдирини назарий жиҳатдан танаффусга қадар ҳал қилган бўлардик. Аммо ҳар доимги “касаллик” яна панд берди.

Иккинчи бўлим ҳам биз учун ёмон бошланмаганди. Ҳатто иккинчи голни ҳам ургандик, бироқ қанот ҳаками Аҳмаджоновни “офсайд”дан гол урди деб ҳисоблади. Очиғи, ҳакамнинг бу қарорига тушунмадим. Ҳужумларимиз голга айланавермагач, йигитлар диққатни йўқотиб қўйишди. Айниқса, ҳимоячилар ўзларига ўхшамай қолишди. Натижада бутун ўйин давомида икки марта жиддий хавфли ҳужум ташкил қилган меҳмонлар ғалабани илиб кетишди.