«Ливерпуль» сардори Виржил ван Дейк Англия чемпионатининг сўнгги турида «Брентфорд»га қарши ўйиндан кейин ўз фикрларини билдириб ўтди. Учрашув 1:1 ҳисобида якунланди. Ушбу натижадан сўнг чемпионлик унвонини ҳимоя қила олмаган «Ливерпуль» Чемпионлар лигасининг кейинги мавсумида иштирок этиш ҳуқуқини қўлга киритди.

«Бу ягона ижобий жиҳат. Бу омадсиз мавсумдан чиқариб олишга ҳаракат қилишимиз керак бўлган энг кам натижа эди. Энди клуб афсоналари билан хайрлашамиз, ҳозир барча эътибор шунга қаратилган», — дея нидерландиялик футболчининг сўзларини келтиради Sky Sports.

«Олдинга ҳаракат қиламиз, фақат олдинга, тўхтамаймиз. Бу менинг фаолиятимдаги энг қийин йил бўлди. Буни қабул қилиш, жамоа бўлиб буларни бошдан ўтказиш оғир кечди. Лекин биз — «Ливерпуль»миз. Биз доимо бундай вазиятлардан янада кучлироқ бўлиб чиқамиз», — дея қўшимча қилди у.

«Ливерпуль» 54 очко билан бешинчи ўринни эгаллади.