«Милан» мавсумнинг сўнгги қисмини муваффақиятсиз ўтказди ва Чемпионлар лигаси йўлланмасидан мосуво бўлди. А Сериянинг сўнгги тур баҳсида «россонерилар» ўз майдонида кутилмаганда «Кальяри»га имкониятни бой беришди (1:2). Натижада, жамоа кучли тўртликдан тушиб қолди ва Европа лигасида иштирок этиш билан чекланишга мажбур бўлди.

Инсайдер Николо Скиранинг хабар беришича, эндиликда Лука Модричнинг клубдаги келажаги жиддий сўроқ остида қолмоқда. Хорватиялик футболчини жамоада қолишга кўндириш осон бўлмайди. 40 ёшли ярим ҳимоячининг амалдаги шартномаси июнь ойи охирида якунига етади, бироқ футболчининг хоҳишига кўра, битим автоматик равишда яна бир йилга узайтирилиши мумкин.

Эслатиб ўтамиз, Мадриднинг «Реал» клуби собиқ футболчиси «Милан» сафида ўтган йилнинг ёзидан буён тўп сурмоқда.