«Ноттингем Форест» сардори Морган Гиббс-Уайт Англия терма жамоасининг ЖЧ-2026 учун қайдномасидан жой олмаганига муносабат билдирди. Фаолиятидаги энг яхши мавсумни ўтказганига қарамай (18 та гол ва 7 та голли узатма), 26 ёшли ярим ҳимоячи Томас Тухель рўйхатига киритилмади.
«Мен таркибда бўлиш учун керак бўлганидан ҳам кўпроқ иш қилдим. Шунчаки кимнингдир шахсий фикрида "нотўғри тарафда" бўлиб қолдим. Ўзимни ўнглаб оламан ва янада кучлироқ бўлиб қайтаман. Шахсан қўнғироқ қилиб, ҳаммасини ўзимга айтгани учун Тухелга ҳурматим баланд. Мавсум якунланганидан хурсандман, энди бор эътиборимни ёзга қаратаман», — дейди футболчи Goal.com нашрига.
