Бугун эрталаб Нуну Эшпириту Санту «Вест Хэм» раҳбарияти билан шошилинч музокараларга чақирилди. Унинг бош мураббий сифатидаги лавозими хавф остида қолмоқда.
The Times нашрига маълум бўлишича, португалиялик мутахассис «Вест Хэм» ҳамраиси Дэвид Салливан ва клуб директорлар кенгашининг бошқа аъзолари билан учрашувга чақирилган. Манбаларнинг тасдиқлашича, учрашув Нунунинг истеъфоси билан якунланиши эҳтимоли жуда юқори.
Якшанба куни Премьер-лигани тарк этган Лондон клуби мураббий билан тузилган шартномадаги бандни фаоллаштириши мумкин. Ушбу банд жамоа юқори дивизиондаги ўрнини сақлаб қола олмаган тақдирда, мураббийни товон пулисиз ишдан бўшатиш имконини беради.
Нуну ўтган йилнинг сентябрь ойида Грэм Поттер ишдан бўшатилганидан сўнг, 8 миллион фунт стерлинггача (бонус тўловлари билан) бўлган уч йиллик шартномага имзо чеккан эди.
Агар португалиялик мутахассис ишдан бўшатилса, клуб икки йил ичида тўртинчи доимий мураббийини қидиришига тўғри келади. Номзодлар орасида «Вест Хэм»нинг собиқ футболчиси Скотт Паркер ва 2015-2017 йилларда жамоани бошқарган Славен Билич каби мутахассислар кўрилмоқда.
