«Борнмут»нинг 19 ёшли ҳужумчиси Эли Жуниор Крупи Лондоннинг «Арсенал» клуби эътиборини тортди. Бу ҳақда Daily Star хабар бермоқда.

«Лорьян»дан 13 миллион евро эвазига «Борнмут»га келиб қўшилган Крупи ёрқин мавсумни ўтказди ва энди унинг трансфер қиймати клуб томонидан 7 баробарга қимматлади (тахминан 90 млн евродан ортиқ). «Арсенал»нинг қизиқишига қарамай, франциялик футболчи ҳозирда «Борнмут»га тўлиқ эътибор қаратганини ва келаси мавсумда жамоа билан еврокубокларда иштирок этишни орзу қилаётганини таъкидлади.

Таъкидлаш жоизки, айнан Крупи «Манчестер Сити» дарвозасига гол уриб, «Арсенал»га муддатидан аввал чемпионликни расмийлаштиришга ёрдам берган эди. Шундан сўнг Микель Артета шогирдларининг кўплаб ўйинчилари унга ижтимоий тармоқларда миннатдорчилик билдиришган.

Крупи ўтган АПЛ мавсумида 13 та гол уриб, 20 ёшгача бўлган дебютантлар ўртасида янги рекорд ўрнатди. Унгача рекорд «Ливерпуль» вакили Робби Фаулер ва «Ковентри»дан Робби Кинга тегишли бўлиб, улар мавсум давомида 12 тадан гол киритишган эди.