«Манчестер Сити» Англия Премьер-лигаси 38-туридан ўрин олган «Астон Вилла»га қарши учрашувдан (1:2) кейин клубни тарк этаётган бош мураббий Пеп Гвардиола, шунингдек футболчилар Бернарду Силва ва Жон Стоунз учун хайрлашув маросими ўтказди.

Маросимга жамоанинг амалдаги футболчиларидан ташқари, ўтган мавсумни «Эвертон»да ижара асосида ўтказган Жек Грилиш ҳамда ҳозирда «Бавария»да фаолият юритаётган «шаҳарликлар»нинг собиқ сардори Венсан Компани ҳам ташриф буюрди.

Футболчилар мухлисларга Гвардиоланинг «Сити»даги 10 йиллик фаолияти давомида қўлга киритилган 20 та совринни намойиш қилди.

Шундан кейин ўйинчилар саҳнадан туриб Пепга мурожаат қилишди. Бернарду эса интернетда мемга айланган видеони эслади. Унда мутахассис ўйин пайтида ёнида кимдир бордек гапиради, аммо унинг ёнидаги ўриндиқ бўш бўлади.

Гвардиола видеони кўриб кулиб юборди ва бироз хижолат ҳам тортди, аммо бу ҳолатга изоҳ топа олмади.