«Интер Майами» матбуот хизмати ҳужумчи Лионель Мессининг жароҳати юзасидан янги маълумотларни эълон қилди.
МЛС доирасида «Филадельфия»га қарши кечган ва 6:4 ҳисобида якунланган ўйиннинг 73-дақиқасида 38 ёшли Аргентина терма жамоаси аъзоси захирага олинган эди.
«Душанба куни ўтказилган қўшимча тиббий текширувлардан сўнг, дастлабки ташхис чап тизза ости пайларидаги мушак чарчоғи билан боғлиқ ортиқча юкламани кўрсатди. Унинг майдонга қайтиш муддати клиник ва функционал тикланиш жараёнига боғлиқ бўлади», — дейилади клуб баёнотида.
Эслатиб ўтамиз, Месси аввалроқ Аргентина терма жамоасининг ЖЧ-2026 учун кенгайтирилган таркибига киритилган эди. Турнир 11 июнда бошланади. Аргентина терма жамоаси мусобақадаги илк учрашувини 17 июнь куни Жазоир термасига қарши ўтказади.
