Мадриднинг «Реал» клуби ярим ҳимоячиси Арда Гюлер ҳужумчи Килиан Мбаппе билан майдондаги ҳамкорлиги ҳақида ўз фикрларини билдирди. Француз футболчиси 25 та гол билан Ла Лиганинг энг яхши тўпурарига айланди. Уларнинг олтитасида айнан туркиялик футболчи бевосита ассистентлик қилди — бу чемпионатдаги энг сермаҳсул дуэт ҳисобланади.

«Килиан билан футболга бўлган қарашларимиз жуда ўхшаш, шу сабабли майдонда ўртамизда ўзига хос «кимё» пайдо бўлган. Майдондан ташқарида ҳам у жуда ажойиб инсон», — дея Гюлернинг сўзларини келтиради Madrid Universal нашри.

Эслатиб ўтамиз, «Реал» Ла Лига турнир жадвалида иккинчи ўринни эгаллади ва «Барселона»дан саккиз очкога ортда қолди. Арда Гюлер мадридликлар сафида 2023 йилдан буён тўп суриб келаётган бўлса, Килиан Мбаппе «қироллик» клубига бир йил кейин келиб қўшилган эди.