Пеп Линдерс Хосеп Гвардиоладан келган таклифни қандай қабул қилганини эслади. Нидерландиялик мутахассис аввалроқ «Ливерпуль»да Юрген Клоппга ёрдам берган, 2025/26 йилги мавсум бошланишидан олдин эса «шаҳарликлар» мураббийлар штабида ассистент лавозимини эгаллаган эди.

«Гвардиола янги жамоа қурмоқчилигини айтди, аммо дарҳол бу лойиҳа узоқ муддатли эмаслигидан огоҳлантирди. У менга мурожаат қилишдан олдин Клоппдан розилик олган. Пепнинг аниқ талаблари бор эди: у ўз штабида ўзига янги чақириқ ташлай оладиган, замонавий Премьер-лига тенденцияларига мос келадиган, жисмоний курашларга бой ва агрессив услубни жорий эта оладиган мураббийни кўришни истаган. Унга инновациялар керак эди», — дея Линдерснинг сўзларини келтиради City Xtra.

Эслатиб ўтамиз, иккала «Пеп» ҳам мавсум якунида «Манчестер Сити»ни тарк этмоқда. Уларнинг иттифоқи жамоага Англия кубоги ва Лига кубогида ғалаба қозонишда ёрдам берди.