«Реал» ҳужумчиси Винисиус Жуниор «Челси» вингери Эстеваонинг жароҳати туфайли Бразилия терма жамоаси сафида Жаҳон чемпионатига бора олмаслиги ҳақида фикр билдирди.
«Эстеваонинг Жаҳон чемпионатида иштирок этмаслиги ачинарли. Бироқ у янада яхшироқ формада қайтишига ишонаман. Унинг иқтидори ақлбовар қилмас даражада. Агар менда уникидек зарба бўлганида, кўпроқ гол урган бўлардим. У жуда ёш, шубҳасиз, у дунёнинг энг яхши ўйинчиларидан бирига айланади», — дея Винисиуснинг сўзларидан иқтибос келтиради CazeTV.
Эслатиб ўтамиз, Эстевао апрель ойида Англия чемпионати доирасида «Манчестер Юнайтед»га қарши ўйинда сон мушагининг тўртинчи даражали узилишини орттириб олган эди. Ушбу жароҳат туфайли у нафақат Жаҳон чемпионатини, балки Англия Премьер-лигасининг кейинги мавсум стартини ҳам ўтказиб юбориши мумкин.
