«Real» hujumchisi Vinisius Junior «Chelsi» vingeri Estevaoning jarohati tufayli Braziliya terma jamoasi safida Jahon chempionatiga bora olmasligi haqida fikr bildirdi.
«Estevaoning Jahon chempionatida ishtirok etmasligi achinarli. Biroq u yanada yaxshiroq formada qaytishiga ishonaman. Uning iqtidori aqlbovar qilmas darajada. Agar menda unikidek zarba bo‘lganida, ko‘proq gol urgan bo‘lardim. U juda yosh, shubhasiz, u dunyoning eng yaxshi o‘yinchilaridan biriga aylanadi», — deya Vinisiusning so‘zlaridan iqtibos keltiradi CazeTV.
Eslatib o‘tamiz, Estevao aprel oyida Angliya chempionati doirasida «Manchester Yunayted»ga qarshi o‘yinda son mushagining to‘rtinchi darajali uzilishini orttirib olgan edi. Ushbu jarohat tufayli u nafaqat Jahon chempionatini, balki Angliya Premyer-ligasining keyingi mavsum startini ham o‘tkazib yuborishi mumkin.
