«Ювентус» шу ёзда ҳимоячи Глейсон Бремерни сотишни режалаштирмоқда. La Stampa нашри берган маълумотларга кўра, бразилиялик футболчига «Интер» қизиқиш билдирмоқда.

Италиянинг амалдаги чемпионлари трансфер бўйича аниқ қадамларни ташлаб, футболчининг вакиллари билан алоқага чиқишган. Бироқ «Ювентус» ўз рақобатчиларига чегирма қилиб бермоқчи эмас ва биринчи навбатда Англия Премьер-лигаси жамоаларидан каттароқ таклиф тушишини кутмоқда.

Глейсон Бремер 2022 йилда «Торино»дан «Ювентус»га 51 миллион евро эвазига ўтган эди. Унинг шартномаси 2029 йилнинг 30 июнигача давом этади. Жорий мавсумда ҳимоячи туринликлар сафида барча турнирларда 31 та ўйинда майдонга тушиб, 4 та гол урди ва 3 та голли узатмани амалга оширди. Transfermarkt портали Бремернинг нархини 35 миллион еврога баҳоламоқда.