BBC журналисти Саймон Стоуннинг ёзишича, Энтони Гордоннинг «Барселона»га ўтиши Маркус Рэшфорднинг клубда қолишига тўсқинлик қилмайди. Аввалроқ «Ньюкасл» вингери «кўк-анорранглилар» сафига ўтиш учун тиббий кўрикдан ўтаётгани хабар қилинганди.

Шунга қарамай, каталонияликларда Рэшфордни «Манчестер Юнайтед»дан 30 миллион еврога сотиб олиш имконияти сақланиб қолмоқда. «Барселона» Гордонни харид қилишга устуворлик бергани ҳисобланади, чунки у ҳам чап қанотда, ҳам марказда ўйнай оладиган универсал футболчи, қолаверса, у Рэшфорддан уч ёш кичик ва маоши ҳам камроқ.

Маркуснинг товон пулини тўлаш учун охирги муддат — 15 июнь. «Барса» келишув шартларини қайта кўриб чиқмоқчи бўлган, бироқ «Юнайтед» бунга рози эмас. Шу сабабли, белгиланган муддатгача келишувга эришилмаслиги мумкин, аммо музокаралар ҳар қандай ҳолатда ҳам давом этиши эҳтимоли бор.

Стоуннинг таъкидлашича, асосий муддат — Англия терма жамоасининг Жаҳон чемпионатидаги иштироки якунланганидан кейинги ва Рэшфорднинг машғулотларга қайтиши оралиғидаги уч ҳафталик давр ҳисобланади. Бу давр ичида бирор бир келишувга келиш керак, акс ҳолда «МЮ» бош мураббийи Майкл Кэррик раҳбарият жамоада кўришни истамайдиган футболчини қайтаришга тайёрми ёки йўқ, деган саволга жавоб беришига тўғри келади.