"Сантос" клуби ЖЧ-2026 да иштирок этиш учун Бразилия терма жамоасига чақирилган ҳужумчи Неймарнинг соғлиғи борасида расмий баёнот берди. Аввалроқ клуб футболчида шиш борлигини маълум қилган бўлса, терма жамоа шифокорлари жароҳат жиддийроқ эканини аниқлаган. Шу сабабли Неймар мундиалдаги илк ўйинни ўтказиб юбориши мумкин.
"Неймарнинг клиник ҳолати юзасидан "Сантос" ФК тиббиёт бўлими қуйидагиларни маълум қилади:
Неймарга ўтказилган барча текширув натижалари 18-сана — терма жамоага чақирув санасига қадар Бразилия футбол конфедерациясига (CBF) топширилган. Икки ҳафталик тикланиш даври 17-санадан бошланиб, шу якшанба (31 май) куни якунланади ва шундан сўнг футболчи машғулотларга қайтиши мумкин. Шуни ёдда тутиш керакки, бу муддатлар жамоа эҳтиёжлари ва ўйинларнинг аҳамиятидан келиб чиқиб, ҳар бир инсон учун турлича бўлиши мумкин. Бразилия терма жамоаси физиотерапия гуруҳи таркибида "Сантос" ФК мутахассислари ҳам бор. Улар Неймарни 10 йилдан ортиқ вақт давомида кузатиб келишмоқда ва тикланиш жараёнининг бутун муддати давомида шундай давом эттиришади. Клуб тиббиёт бўлими CBF тиббий гуруҳи томонидан белгиланган даволаниш режасига рози. "Сантос" мутахассислари футболчининг тикланиш қобилиятини яхши биладилар ва Неймар Жаҳон чемпионатида иштирок этишга тайёр бўлишига ишонадилар", — дея баёнотдан иқтибос келтиради Globo.
