Россия терма жамоаси Қоҳирада ўтказилган ўртоқлик учрашувида Миср терма жамоасига 0:1 ҳисобида имкониятни бой берди.
Учрашувдаги ягона гол 65-дақиқада мисрлик ярим ҳимоячи Мостафа Зико томонидан киритилди.
Бу Россия терма жамоасининг 2026 йилдаги илк мағлубияти бўлди. Эслатиб ўтамиз, март ойида бўлиб ўтган ўйинларда жамоа Никарагуа устидан ғалаба қозонган (3:1) ва Мали билан дуранг (0:0) ўйнаган эди.
Июнь ойида терма жамоа яна иккита ўртоқлик учрашувини ўтказиши режалаштирилган. 5 июнь куни Волгоградда Буркина-Фасога қарши, 9 июнь куни эса Калининградда Тринидад ва Тобаго терма жамоаларига қарши баҳс олиб борилади.
Таъкидлаш жоизки, Миср терма жамоаси ЖЧ-2026 иштирокчиси ҳисобланади. Улар мундиалнинг «G» гуруҳидан жой олган бўлиб, Бельгия, Янги Зеландия ва Эрон терма жамоалари билан рақобатлашади. Мусобақа 11 июндан 19 июлгача АҚШ, Канада ва Мексикада бўлиб ўтади.
