Лондоннинг «Челси» клуби вингери Алехандро Гарначога Англия Премьер-лигасининг бошқа жамоалари томонидан қизиқиш билдирилмоқда. MatchDay Central нашрининг хабар беришича, 21 ёшли аргентиналик футболчи хизматига «Сандерленд» ва «Тоттенхэм» клублари кўз тиккан.
Бироқ ҳозирда трансфер амалга ошиши эҳтимоли паст баҳоланмоқда. Бунга асосий сабаб — «Челси» раҳбарияти ўз футболчиси учун 70 миллион фунт стерлинг (тахминан 81 миллион евро) талаб қилаётганидир. Таъкидлаш керакки, «аристократлар» Гарначони ўтган йилнинг август ойида «Манчестер Юнайтед»дан 46 миллион евро эвазига сотиб олган эди.
Алехандро Гарначо ўтган мавсумда «Челси» сафида барча турнирларда 43 та учрашувда майдонга тушди. У ушбу ўйинларда 8 та гол уришга ва 4 та голли узатмани амалга оширишга муваффақ бўлди.
