Бразилия терма жамоаси бош мураббийи Карло Анчелотти ҳужумчи Неймарнинг жароҳати юзасидан ўз фикрини билдирди. Яқинда юлдуз футболчи жароҳат олган эди, бироқ унгача Неймар «селесао»нинг Жаҳон чемпионати учун якуний таркибига киритилганди.
— Биз Неймар Жаҳон чемпионатидаги Марокашга қарши биринчи ўйинга тайёр бўлишини кутмоқдамиз. Агар у тайёр бўлмаса, иккинчи ўйинни кутамиз. Биз таркибдаги ҳеч кимни алмаштирмаймиз, — деди мураббий.
Журналистнинг: «Агар Неймар жароҳат олганини олдиндан билганингизда, уни Жаҳон чемпионатига чақирган бўлармидингиз?» — деган саволига Анчелотти ўзига хос тарзда жавоб қайтарди:
— Агар бобомнинг ғилдираклари бўлганида, у автомобиль бўларди.
Бразилия терма жамоаси 2026 йилги Жаҳон чемпионатидаги илк учрашувини 14 июнь куни Марокаш терма жамоасига қарши ўтказади.
