"Брайтон" ярим ҳимоячиси Карлос Балебанинг "Манчестер Юнайтед"га ўтиши барбод бўлиш арафасида. "Қизил иблислар" 22 ёшли футболчининг истеъдодини ҳамон юқори баҳолашади, бироқ сўнгги пайтларда унга бўлган қизиқиш анча сўнди. The Sun нашрига таяниб Transfer News Live хабар беришича, бунга "чайкалар" томонидан белгиланган нарх сабаб бўлмоқда.

Манчестерликлар ярим ҳимоячи учун талаб қилинаётган маблағни тўлашга тайёр эмаслар, шу сабабли улар бошқа номзодларга эътибор қаратишди. Карлос Балебанинг бозор қиймати Transfermarkt экспертлари томонидан 55 миллион еврога баҳоланмоқда. Кўплаб миш-мишларга кўра, "МЮ" камерунлик футболчини ўтган ёздаёқ ўз сафига қўшиб олмоқчи бўлган, аммо ўшанда ҳам "Брайтон"нинг ўта юқори талаби асосий тўсиқ бўлган эди.

Эслатиб ўтамиз, айни дамда "Манчестер Юнайтед" ярим ҳимоя чизиғини кучайтириш учун бошқа номзодлар, жумладан, "Аталанта" футболчиси Эдерсон билан музокараларнинг якуний босқичида экани хабар қилинмоқда.