Ҳимоячи Ибраима Конате «Ливерпуль»даги фаолиятини давом эттирмайди. Мерсисайдликлар клуби француз футболчиси ёзда шартнома муддати тугагани сабабли клубни тарк этишини эълон қилди. «Қизиллар» Конатега кўрсатган ўйинлари учун миннатдорчилик билдириб, футболчига келгуси фаолиятида муваффақиятлар тилади.

Апрель ойида Конате «Ливерпуль» билан шартномани узайтириш бўйича олиб борилаётган музокаралар ҳақида гапирганда, оптимистик кайфиятда эди. Кўринишидан, футболчи ва клуб келишув шартлари бўйича барибир ўзаро келиша олмаган. Шу тариқа, Конате бошқа клубга эркин агент сифатида ўтиши мумкин.

Ибраима Конате «Ливерпуль»да беш мавсумни ўтказди. 27 ёшли франциялик ҳимоячи мерсисайдликлар сафида жами 183 та расмий ўйинда майдонга тушган. Ушбу ўйинларда Конате 7 та гол урган ва 4 та голли узатмани амалга оширган.