ФИФА ҳакамлар қўмитаси раҳбари Пьерлуиджи Коллинанинг маълум қилишича, ЖЧ-2026 мусобақасида дарвозабонга майдонда тиббий ёрдам кўрсатилаётган пайтда футболчилар майдон четига келиб, мураббийлар билан гаплашишлари тақиқланади.
«Биз турнирда иштирок этувчи 48 та жамоанинг барча бош мураббийлари билан семинар ўтказиб, ҳакамлар бу борада фаол ҳаракат қилишлари ҳақида огоҳлантирдик. Дарвозабон жароҳат олиб майдонда ётган вақтда, ҳакамлар жамоаларнинг захира ўриндиғига яқинлашишига йўл қўйишмайди.
Дарвозабон жароҳат олиш ҳуқуқига эга, бироқ майдондаги футболчиларнинг майдонни тарк этиб, мураббийлар билан ўзига хос «тайм-аут» ташкил қилишга ҳаққи йўқ. Майдонда фақат ҳакам, физиотерапевт ва дарвозабон қолиб, қолган барча футболчиларнинг четга чиқиб кетиши жуда ғалати туюлади ва бу нотўғри», — деди ФИФА расмийси.
Шунингдек, Коллинанинг қўшимча қилишича, эндиликда VAR тизими тўп ўйинга киритилгунга қадар содир бўлган қоидабузарликларни ҳам кўриб чиқиш ҳуқуқига эга бўлади. Масалан, бурчак тўпи тепилишидан олдин фол ишлатилган бўлса, ўша вазият қайтадан кўриб чиқилиши мумкин.
