Мадриднинг «Реал» клуби президенти Флорентино Перес футболнинг келажаги ҳақида ўз фикрлари билан ўртоқлашди. Бу ҳақда у «La Razon» нашрига берган интервьюсида гапириб ўтди.

«Футбол келажакда ўзгаради, аммо моҳиятан ўша-ўша бўлиб қолади. Футболда ҳамма нарса катта пул ишлаб топишга бориб тақалади. Менинг илк президентлик муддатимда даромадлар асосан телевидение орқали келарди», — деди Перес.

«Ҳозирда иккинчи технологик инқилоб бошланяпти. Бир неча йилдан бери дунёни ўзгартирган ва бизга унга янги кўз билан қарашга ёрдам берган етакчи компания — Apple билан ҳамкорлик қилмоқдамиз. Биз бутун дунё бўйлаб миллиардлаб мадридистларга қувонч бағишлаш мақсадидаги ажойиб лойиҳа устида иш бошлаяпмиз».

«Сиз тоғда, уйда ёки чўлда бўлишингиз мумкин. Кўзойнакни тақасиз — ва шунчаки ўйинни томоша қилмайсиз. Сиз ҳозир тасаввур қилиш ҳам қийин бўлган тажрибага эга бўласиз. Футболчи пенальти тепганда, сиз унинг ёнида бўлишингиз ва ҳаммасини унинг кўзи билан кўришингиз мумкин бўлади», — дея таъкидлади Перес.

Маълумот учун, Мадриднинг «Реал» клуби президентлиги учун сайловлар 7 июнь куни бўлиб ўтади. Бу лавозимга 2009 йилдан буён клубни бошқариб келаётган Флорентино Перес ва тадбиркор Энрике Рикельме даъвогарлик қилмоқда.