«Барселона»нинг собиқ футболчиси Андрес Иньеста БААнинг «Галф Юнайтед» клубини қабул қилиб олди ва мураббийлик фаолиятини бошлади.
УЕФАнинг «А» тоифали мураббийлик лицензиясига эга бўлган ёш мутахассис қуйидагича фикр билдирди:
«Галф Юнайтед» мен учун янги бобни бошлаш учун тўғри жойдек туюлмоқда. Футбол менга ҳамма нарсани берди ва энди мен унга мураббийлик иши, ўқитиш ҳамда юқори савияга эришиш учун интилиш ва иқтидорга эга бўлган ёш ўйинчилар билан кундалик иш орқали қайтармоқчиман.
Мен футболчиларни тўғри ривожлантиришга ишонаман: сабр-тоқат, қандай ўйнаш кераклигини аниқ тушуниш ва ҳар бир ўйинчига чин дилдан ғамхўрлик қилиш билан. «Галф Юнайтед» ҳам шу фалсафани қўллаб-қувватлайди ва мен айнан шунинг учун шу ердаман. Мен мураббий сифатида ривожланишни, реал тажриба олишни ва Pro мураббийлик лицензиясини қўлга киритишни истайман», — дея Иньестанинг сўзларини келтиради «Галф Юнайтед» сайти.
Эслатиб ўтамиз, 2010 йилда Андрес Иньеста жаҳон чемпионати финалидаги ягона гол муаллифи бўлган эди.
