«Борнмут»нинг собиқ бош мураббийи Андони Ираола тез орада «Ливерпуль»ни бошқаради. Бу ҳақда нуфузли инсайдер Фабрицио Романо хабар берди.
Манбага кўра, «Ливерпуль» Ираола билан шартнома бўйича келишувга эришган. Журналистнинг маълум қилишича, томонлар сўнгги 48 соат ичида музокараларда сезиларли ютуқларга эришиб, битимни тезда якунлашга муваффақ бўлишган.
Мерсисайдликлар бош мураббийи лавозимида Ираола ишдан бўшатилган Арне Слотни алмаштиради. Ўтган мавсумда «Ливерпуль» Англия чемпионати турнир жадвалида 60 очко билан бешинчи ўринни эгаллади.
Таъкидлаш жоизки, Ираола бошчилигидаги «Борнмут» олтинчи ўринни эгаллади ва клуб ўз тарихида илк бор еврокубокларга йўлланма олди.
