Кеча 6 сентябрь куни Қарши шаҳридаги Марказий стадионда "Насаф" жамоаси Самарқанднинг "Динамо" жамоаси билан назорат учрашув ўтказди. Ушбу учрашув Олий лига 18-тури олдидан "Локомотив" жамоасига қарши учрашувга тайёргарлик доирасида ўтказилади.

Учрашув биринчи бўлимида ҳисоб очилмади. Иккинчи бўлимнинг 81-дақиқасида ўйинни бошқариб бораётган ҳакам томонидан "Динамо" жамоаси дарвозасига 11 метрлик пенальти белгиланди. Жарима тўпини бехато амалга оширган Сухроб Неъматов ўз жамоасини ҳисобда олдинга олиб ўтди - 1:0.

Орадан 5 дақиқа ўтиб, "Насаф" жамоасининг моҳир ҳимоячиси Ҳамза Каримов ҳисобни 2:0 кўринишига олиб келди. Учрашувда бошқа голлар киритилмади.

Шундай қилиб, назорат учрашувида Рўзиқул Бердиев шогирдлари "Динамо" жамоасини 2:0 ҳисобда мағлубиятга учратишди.

Эслатиб ўтамиз, "Насаф" жамоаси 13 сентябрь куни Тошкентда Олий лига 18-тури доирасида "Локомотив" жамоасига қарши майдонга тушади.

Назорат учрашуви. 6 сентябрь, Марказий стадион
"Насаф" (Қарши) - "Динамо" (Самарқанд) 2:0 (0:0)
Голлар: Суҳроб Неъматов пенальтидан 81 - 1:0, Ҳамза Каримов 86 - 2:0.