«Челси» ва «Реал» клубларининг собиқ ярим ҳимоячиси Эден Азар Бельгиянинг Quick тез овқатланиш тармоғи билан ҳамкорликни бошлади. Бу ҳақда компания матбуот хизмати хабар берди.
Азар Жаҳон чемпионати олдидан ўтказилаётган Quick маркетинг кампаниясининг бир қисмига айланди. У «Эден» номли бургерларни реклама қилади. Мазкур бургерлар уч хил кўринишда — мол гўшти, товуқ гўшти ва балиқ билан таклиф этилмоқда.
Бургер таркибига котлета ёки балиқ филесидан ташқари икки карра эритилган чеддер пишлоғи, қовурилган пиёз ҳамда аччиқ андалусча соус қўшилади. Барчаси андалус услубидаги зираворли булочка ичида тақдим этилади.
Сотувдан тушган маблағнинг бир қисми QuickFix лойиҳасига йўналтирилади. Ушбу ташаббус доирасида компания Бельгия бўйлаб болалар ва ёшлар учун мўлжалланган спорт майдончаларини таъмирлаш ва жиҳозлаш ишларини амалга оширади.
Қизиғи шундаки, бу Азарнинг фастфуд соҳасидаги илк ҳамкорлиги эмас. 2021 йилда «Макдоналдс» Бельгия футбол терма жамоаси футболчиларидан илҳомланган Red Devils Burgers номли янги бургерлар сериясини тақдим этган эди. Ўшанда Эден Азар янги маҳсулот рекламаси учун ўтказилган фотосессияда шахсан иштирок этган.
