«Барселона» ҳужумчиси Ферран Торрес Испания терма жамоасининг олдинда турган Жаҳон чемпионатидаги истиқболлари ҳақида нима деб ўйлашини айтиб ўтди. Амалдаги Европа чемпионлари АҚШ, Канада ва Мексикада ўтадиган мундиалнинг асосий фаворитларидан бири сифатида эътироф этилмоқда.
«Босим борлигини ҳис қиляпмиз, буни инкор этмаймиз. Биз турнирга бутун мамлакат биздан умид қилаётганини англаган ҳолда боряпмиз. Лекин бизга бу босим ёқади, биз одамларни хурсанд қилишни истаймиз. Испанияга совринни олиб келиш учун қўлимиздан келган барча ишни қиламиз», — дея Торреснинг сўзларини келтиради «Barca Universal».
«Қизил фурия»нинг гуруҳ босқичидаги рақиблари — Кабо-Верде, Уругвай ва Саудия Арабистони терма жамоаларидир.
