«Ливерпуль»нинг собиқ ҳимоячиси Йон-Арне Риисе жамоанинг якунланган мавсумдаги натижалари ҳақида фикр билдирди.

– «Ливерпуль» 2024/25 йилги мавсумда ҳақли равишда чемпион бўлганди ва Чемпионлар Лигасида «ПСЖ»га энг кўп муаммо туғдирган жамоа бўлса керак. Ёзда улар жуда катта пул сарфлашди, бу йил эса бешинчи ўринни эгаллашди. Нима содир бўлди?

– Менимча, баъзи футболчилар ўзларини энг яхши томонлама кўрсата олишмади. Рақиб жамоалар ўз ўйинларини кучайтиришди ва «Ливерпуль» тактикасини ўрганиб олишди. Мен тезкор қарши ҳужумларда уларнинг ҳужумкорлик кучи етишмаганини сездим. Ўтган мавсумда тўпни олиб қўйишганида заҳотиёқ ҳужумга ўтишаётганини кўрардик. Бу йил эса ҳар сафар тўп йўқотилганда ўз дарвозамиз олдида хавф туғилаверди. Албатта, жароҳатлар бўлди, лекин улар барча жамоаларда учрайди. Футболчиларнинг индивидуал ўйинлари ўз даражаларига мос келмади.

Ўтган мавсум бошланишидан олдин Салоҳ, Ван Дейк ва Трент шартномаларини узайтирадими ёки йўқми, шуни муҳокама қилаётган эдик. Катта пул сарфладик. Янги футболчиларнинг мослашиши эса вақт талаб этади. Кейин Исак жароҳат олди. Кейинги мавсумда уларни катта ҳажмдаги иш кутмоқда. Салоҳ кетганидан кейин улар бошқа ўйинчи сотиб олишлари керак. Баъзи футболчилар билан хайрлашиб, янгиларини олиб, олдинга ҳаракат қилиш лозим. Улар чемпионлик учун курашишлари шарт.

– Диогу Жотанинг ўлими ҳам бу мавсумдаги натижаларга таъсир қилди деб ҳисоблайсизми?

– 100 фоиз. Тайёргарлик бутунлай бошқача бўлди. Жамоа ажойиб ўйинчини, футболчилар яқин дўстини, мухлислар эса жуда қаттиқ ҳурмат қиладиган афсонавий футболчини йўқотишди. Менимча, одамлар бу воқеа жамоага қанчалик кучли таъсир қилиши мумкинлигини охиригача тушунишмаяпти, — деди Риисе.