«Манчестер Сити» ва «Челси» Энцо Маресканинг трансфери учун компенсация тўлови масаласини муҳокама қилмоқда.

Аввалроқ италиялик мутахассис Пеп Гвардиола ўрнини эгаллаб, «шаҳарликлар» бош мураббийига айланиши хабар қилинганди. Sky Sports нашрининг ёзишича, Манчестер клуби компенсация миқдори бўйича келишувга шу ҳафта эришишга умид қилмоқда.

Таъкидланишича, мураббий билан уч йиллик шартнома ҳали тўлиқ келишиб олинмаган, бироқ томонлар яқин кунларда сўнгги тафсилотларни ҳал қилишлари керак. Айни дамда улар Маресканинг расман қачон иш бошлаши, унинг мураббийлар штаби таркиби ва бошқа майда деталларни муҳокама қилишмоқда.

Мареска «Челси»ни 2024 йилнинг июнидан 2026 йилнинг январигача бошқарган. Унинг лондонликлар билан амалдаги шартномаси 2029 йил ёзигача мўлжалланган эди.