Европа футбол ассоциациялари иттифоқи (УЕФА) йирик халқаро турнирлар саралаш босқичидаги плей-офф ўйинлари регламентига ўзгартиришлар киритади. Бу ҳақда Football Meets Data хабар бермоқда.
Эндиликда биринчи саватчадан жой олган жамоалар нафақат ярим финални, балки плей-офф финалини ҳам ўз майдонида ўтказиш кафолатига эга бўлади.
Илгари плей-офф финали мезбони қуръа ташлаш йўли билан аниқланар эди. Шу сабабли, баъзи сараланган терма жамоалар ҳал қилувчи учрашувларни меҳмонда ўтказишга мажбур бўлган.
Хусусан, 2026 йилги Жаҳон чемпионати саралаш босқичи плей-офф ўйинларида Италия, Дания ва Туркия терма жамоалари финал баҳсларини сафарда ўтказди. Италия ва Дания ушбу ўйинларда мағлуб бўлиб, мундиал йўлланмасини қўлга кирита олмаган эди.
